வவுனியாவிலும் கருத்தரங்கொன்று ஒழுங்கு செய்யப்பட்டிருந்தபோதும் இறுதி நேரத்தில் அது கைவிடப்பட்டது.

FOSSed On Wheels நிகழ்ச்சி, கொழும்புக்கு வெளியே கட்டற்ற மென்பொருள் இயக்கத்தினை அறிமுகப்படுத்தவும் கொழும்புக்குள் மட்டும் நில்லாது இலங்கையின் ஏனைய பாகங்களிலும் கட்டற்ற மென்பொருள், லினக்ஸ் பயன்பாடு தொடர்பான அறிவினை, விழிப்புணர்வினை எடுத்துச்செல்வதற்குமாக வடிவமைக்கப்பட்டது.

இந்த நிகழ்ச்சி கண்டியிலிருந்து வவுனியா வழியாக யாழ்ப்பாணம் வரை கருத்தரங்குத்தொடரினைக் கொண்டிருந்ததால் “FOSSed On Wheels A9″ என்று பெயரிடப்பட்டது.

வடக்குக்கிழக்கைப் பொறுத்தவரை திருகோணமலையில் கடந்த ஆண்டே இக்கருத்தரங்கு ஒழுங்குபடுத்தப்பட்டு வெற்றிகரமாக நடத்தப்பட்டது. அதற்கு வெளியே தனிப்பட நானும் திருகோணமலையில் இவ்வாறானதொரு கருத்தரங்கினைச் செய்திருந்தேன். தென்கிழக்குப்பல்கலைக்கழகத்துடன் இணைந்து நாம் சம்மாந்துறையில் செய்த கருத்தரங்கும் வெற்றிகரமானதே. யாழ்ப்பாணத்தைப்பொறுத்தவரை கட்டற்ற மென்பொருள் தொடர்பான முதல் கருத்தரங்கு இதுவாகும்.

யாழ்ப்பாணப் பல்கலைக்கழகத்தின் முனைவர் சார்ள்ஸ் இக்கருத்தரங்கினை எம்மோடும் LSF உடனும் தொடர்பாடி ஒருங்கிணைத்திருந்தார்.

வாழ்க்கையில் முதன்முறையாக நான் யாழ்ப்பாணம் செல்வதற்கு வாய்ப்பினை ஏற்படுத்தித்தந்தமைக்காக இவர்கள் எல்லோருக்கும் நான் நன்றி சொல்ல வேண்டும். கூடவே முதன்முறையாக என்னை யாழ்ப்பாணத்திற்கு அழைத்துச்சென்றது கட்டற்ற மென்பொருளே என்பது மகிழ்ச்சிக்குரிய விடயம்.

ஏழு சிங்களத் தோழர்களுடன் நானும் நிவேதனுமாக இரு தமிழர்கள் அணியில் இடம்பெற்றிருந்தோம்.

முதன்முறையாக ஒரு கருத்தரங்கு. கட்டற்ற மென்பொருளுக்கும் எமக்கும் எவ்வளவு தூரம் யாழ்ப்பாணத்தில் வரவேற்பு இருக்கும் என்பது எதிர்பார்ப்பையும் அச்சத்தையும் ஏற்படுத்தியிருந்தது.

ஆனால் யாழ்ப்பாணப் பல்கலைக்கழகமோ வெற்றிகரமாக இக்கருத்தரங்கினை ஒழுங்குபடுத்தியிருந்தற்கும் மேலாக எதிர்பாராத பெரு வரவேற்பில் எம்மைத் திக்குமுக்காடச்செய்துவிட்டது.

2007 இல் ரிச்சர்ட் ஸ்டால்மன் இலங்கை வந்தபோது மாலபேயிலும் பேராதனையிலும் நாம் ஒழுங்குபடுத்திய கருத்தரங்குகளே வரலாறு காணாத ஆர்வலர் கூட்டத்தினை கட்டற்ற மென்பொருளுக்காகக் கூடவைத்திருந்தது.

சரி, ரிச்சர்ட் ஸ்டால்மன் வந்தால் சனம் கூடும் தான். பின்பு திருகோணமலையில் நான் செய்த கருத்தரங்கும் மிகவும் வெற்றிகரமானதாக அமைந்தது. ஆனால் யாழ்ப்பாணத்திலோ இது எதிர்பாராத பெரு வெற்றி. எம்மோடு கொண்டுபோயிருந்த கையேடுகள் தீர்ந்துபோன அனுபவம் இலங்கை லினக்ஸ் பயனர் குழுமத்தினருக்கு இதுவே முதன்முறை.

இலங்கை பூராகவும் உள்ள கட்டற்ற மென்பொருள் ஆர்வலர்களின் twitter களும் faceook இந்த வெற்றிச்செய்தியை நீண்ட நேரத்துக்கு எதிரொலித்துக்கொண்டிருந்தன.

கருத்தரங்கின் நிகழ்ச்சி நிரல் வருமாறு:

1. கட்டற்ற திறந்த ஆணைமூல மென்பொருட்களுக்கான அறிமுகமும் கோட்பாட்டு அடிப்படைகளும் – மு. மயூரன்

2. லினக்ஸ் பற்றிய தொழிநுட்ப அறிமுகமும் தொழிநுட்ப விளக்கங்களும் – நிவேதன்

3. பணியிடத்தில் லினக்ஸ் பயன்பாடும் கட்டற்ற மாற்று மென்பொருட்களும் – சாரங்க, குங்சன

இடைவேளை

4. இணையப் பாதுகாப்பு, அந்தரங்கம், மறைகுறியாக்க (encryption) வழிமுறைகள். – மு. மயூரன், சுச்சேத்த

5. லினக்சில் தமிழ்ப் பயன்பாடு – மு. மயூரன்

6. கலந்துரையாடல்.

இதில் இணையப் பாதுகாப்பு பற்றிய அளிக்கை யாழ்ப்பாணத்துக்கு போகும் வழியில் எம்மால் நிகழ்ச்சிநிரலில் உள்ளடக்கப்பட்டது.

இணையத்தளம் மீதான தணிக்கைகள் பற்றிய செய்திகள், யாழ்ப்பாணத்துக்குப் போய்க்கொண்டிருக்கும் அகலப்பாட்டை இணைப்பு போன்றவை கண்ணில் பட்டபோது மிகப்பெரிய எண்ணிமப் பொறிக்குள்(Digital Trap) யாழ்ப்பாண மக்கள் மாட்டுப்படப்போகிறார்கள் என்கிற உண்மையை சமூகப்பொறுப்புணர்வோடு அந்த மக்களுக்கு சொல்லவேண்டியவர்களாக கட்டற்ற மென்பொருள் இயக்கத்தினர் இருக்கிறார்கள் என்பதை உணர்ந்தோம்.

இதன்பின்னர் மிக நீண்ட உரையடாலுக்குப் பிறகு இத்தலைப்பினை உள்ளடக்குவதற்குத் தீர்மானித்தோம். நாம் சொல்ல நினைத்த செய்தி அங்கே கருத்தரங்கில் கலந்துகொண்டவர்களிடம் உரிய முறையில் போய்ச் சேரும் என்றே நம்புகிறோம்.

முதன்முறையாகக் கட்டற்ற மென்பொருளை அறிமுகப்படுத்த யாழ்ப்பாணம் போன எம்மை கட்டற்ற அன்போடும், வெற்றிகரமாக ஒழுங்குபடுத்தப்பட்ட நிகழ்ச்சியோடும் இறால் பொரியலோடும் கணவாய்க்குழம்போடும் வரவேற்ற யாழ் பல்கலைக்கழக சமூகத்துக்கு மனம் கனிந்த நன்றிகள்.

–

கருத்தரங்கில் எனது பேச்சின் ஆரம்பப் பகுதி:

பலர் என்னிடம் இவ்வாறான விசைப்பலகைகளை எங்கே வாங்கலாம் என்று கேட்டவண்ணம் இருந்தனர். அவர்களும் இவ்விசைப்பலகை தேவைப்படுவோரும் கொழும்பில் இருந்தால் வாங்கிக்கொள்ளலாம்.

இவ்விசைப்பலகையில் இலங்கையின் நியம விசைப்பலகைத் தளக்கோலங்களான, ரெங்கநாதன் (தமிழ்), விஜயசேகர (சிங்களம்) ஆகியவை பொறிக்கப்பட்டுள்ளன. தமிழ், சிங்களம், ஆங்கிலம் ஆகிய மூன்று மொழி எழுத்துக்களும் முறையே நீலம், சிவப்பு, வெள்ளை நிறங்களில் கறுப்புநிற விசைகளின் மேல் பொறிக்கப்பட்டுள்ளன.

இலங்கையின் நியமத் தமிழ் விசைப்பலகை தளக்கோலமான ரெங்கநாதன் வடிவம் இங்கே பரவலாகப் பயன்படுத்தப்படும் “பாமினி” முறைய அடியொற்றியது. சில பயன்மிகு திருத்தங்கள், மேம்படுத்தல்கள் செய்யப்பட்ட “பாமினி” தளக்கோலமே அது. பாமினி முறையில் தட்டெழுதப்பயின்றவர்களுக்கு இது மிகவும் இலகுவானதாக அமையும்.

இவ்விசைப்பலகை தளக்கோலத்தினை இங்கே பாருங்கள்.

நான் இவ்விசைப்பலகை விற்கப்படக் கண்ட கடையின் முகவரி:

TECH Information Solutions (PVT) Ltd.
322, 1st Floor, Unity Plaza,
Colombo 4.
Tel: 0112596042

1200 ரூபா விலைகுறித்துள்ளார்கள்.

இவ்விசைப்பலகை கிடைக்கக்கூடிய வேறு கடைகளின் முகவரிகள் தெரிந்தால் பின்னூட்டம்வழியாக இங்கே அறியத்தாருங்கள். கூடவே இதைவிடக்குறைவான விலையில் விற்கப்பட்டாலும் அதனைக் குறிப்பிடுங்கள்.

கூடவே அந்தப்பதிவில் பின்னூட்டங்கள் வழியாக இடம்பெறும் ஆரோக்கியமான உரையாடல்களிலும் பங்குபெற அழைக்கிறேன். (அங்கே உரையாடல் நடக்க வசதியாக இவ்விடுகைக்கான பின்னூட்ட வசதி பூட்டப்படுகிறது)

கட்டுரை:

http://masivakumar.blogspot.com/2009/09/blog-post_27.html

சாதாரணமாக ஒரு மின்னஞ்சல் குறிப்பு எழுதுவதற்கு சிக்கலான Desktop Publishing மென்பொருட்களைப் பயன்படுத்த நேர்வது ஒரு கெட்ட அனுபவமாகத்தான் இருக்கமுடியும்.

சாதாரணமாக கட்டுரை கடிதம் எழுத மிக மிக எளிமையான Notepad போன்ற உரைத்திருத்திகளையே பயன்படுத்தி வருகிறேன். Open Office கூட நான் பெரிதாகப் பயன்படுத்துவதில்லை.

இதைப்போலவே வீடியோக்கோப்புக்களை தொகுக்கவும் திருத்தவும் எனக்குத் தேவைப்படுவது சிக்கலில்லாத எளிய சாதாரணமான ஒரு வீடியோ தொகுப்பு மென்பொருள்.

அப்படி ஒன்றை நீண்ட காலமாகத் தேடிக்கொண்டிருக்கிறேன்.

நாலைந்து ஆண்டுகளுக்கு முன் வின்டோஸ் பயன்படுத்திய காலத்தில் Windows Movie Maker என்றொரு மென்பொருள் இருந்தது. அது பரவாயில்லை. எளிமையானது. சிக்கலற்றது. ஆனால் அது wmv வடிவில் மட்டும்தான் சேமிக்கும். இது பெரிய தலையிடி. கூடவே அம்மென்பொருள் கட்டற்றதல்ல. எனவே அதில் தங்கியிருக்க முடியாது.

இப்போது க்னூ/லினக்சில் ஏராளம் வீடியோ தொகுப்பு மென்பொருட்களைப் பார்த்தாகிவிட்டது.

தொழின்முறைத் தொகுப்புக்கு உதவும் Cinelerra, Lives போன்றவை எனக்கு பெருஞ்சுமை. அவற்றைப்பயன்படுத்தவும் எனக்குத்தெரியாது அத்தோடு அதைக்கற்றுக்கொள்வதல்ல எனது முக்கியமான நோக்கம்.

பிறகு நான் கண்டுபிடித்தது Kdenlive இது ஒரே நேரத்தில் தொழின்முறை நேர்த்தியுடன் இருப்பதோடு எளிமையும் வாய்க்கப்பெற்றது. அடிக்கடி நின்றுபோகிற, rendering நேரத்து வழுக்களைப் பொறுத்துக்கொண்டால் அருமையான மென்பொருள்தான்.

Kdenlive குழுவினர் எதிர்காலத்தில் ஒரு மிகச்சிறந்த வீடியோத்தொகுப்பு மென்பொருளை கட்டற்ற மென்பொருள் உலகுக்கு அளிக்கப்போகிறார்கள் என்பதில் எந்த மாற்றுக்கருத்துக்கும் இடமில்லை. ஆனால் இப்போதைக்கு அதில் வழுக்கள் அதிகம். கூடவே உபுண்டுவுடன் ஒத்திசைய மறுக்கும் பிரச்சினைகளும் உண்டு.

அதுவும் கூட எனக்கு அதிகமானதே.
எனக்குத்தேவை. எளிமை.

தேடு தேடென்று தேடியதில் எனக்குக் கிடைத்த மென்பொருள்தான் “PiTiVi”.

என்ன தேவையோ அது மட்டுமே உள்ள மென்பொருள்.

எனக்கென்ன தேவை?

* இருக்கிற வீடியோ கோப்புக்களை வெட்ட, திருத்த, ஒட்ட வேண்டும்.

* ஒலியை அகற்ற/சேர்க்க வேண்டும்.

* வேறொரு கோப்பு வடிவத்தில்/ அதேகோப்பு வடிவத்தில் சேமிக்க வேண்டும்.

உரைக்கு எப்படி Notepad இருக்கிறதோ அப்படி வீடியோவுக்கு வேண்டும்.

அச்சொட்டதாக இந்தத்தேவையை நிரப்புகிறது PiTiVi.

அதில் இவ்வளவுதான் செய்யமுடியும்.

இப்பொழுது எனக்கு திருப்தி.

இந்தச்செயலியை மேம்படுத்துகிறோம் பேர்வழி என்று மேலும் மேலும் சிக்கலாக்கிக்கொண்டு போகாமல் இதே எளிமையுடன் மேலும் சிற்சில திருத்தங்கள் விருத்திகளுடன் பராமரித்தாலே போதும் PiTiVi குழுவினருக்கு நான் நன்றிஉடையவனாயிருப்பேன்.

http://tinyurl.com/ljs9ms Test out this Tamil Text to Speech Engine. Quite good! Avoid numbers and non-natural Tamil names.

விக்சனரி குழுமத்துக்கும் உத்தமம் மடலாடற்குழுவுக்கு அனுப்பி வைக்கப்பட்டிருந்த அந்த இனிய செய்தி அனுப்பப்பட்டிருந்தது.
A G Ramakrishnan தமிழ் ஒருங்குறி உரைப்பகுதிகளை குரல்வழியாகப் படித்த்துக்காட்டும் செயலி ஒன்றின் சோதனைப்பதிப்பை அறிமுகப்படுத்தியிருந்தார்.

பெங்களூர் IISc இன் Mile ஆய்வுகூடம் முனைவர் A G Ramakrishnan தலைமையில் இதனை உருவாக்கி வெளியிட்டுள்ளது.

தற்போது இதனைச் சோதித்துப்பார்க்க

http://mile.ee.iisc.ernet.in:8080/tts_demo

என்ற தொடுப்புக்குச் செல்லுங்கள்.

தமிழ் ஒருங்குறியில் அமைந்த உரைப்பகுதி ஒன்றினை நகலெடுத்து அங்கே உள்ளிடுங்கள் அல்லது நேரடியாக தட்டெழுதுங்கள்.

submit என்ற விசையை அழுத்தியதும் உருவாக்கப்பட்ட ஒலிக்கோப்பினைத் தரவிறக்குவதற்கான தொடுப்புக் கிடைக்கும்.

கோப்பினைத் தரவிறக்கிக் கேட்டுப்பாருங்கள்.

முழுமையான மடல் வருமாறு:

Dear Great Contributors to Tamil,

Our MILE’s lab’s Tamil TTS (Text to speech conversion engine) has been made

available as a Web Demo. Go to the following link:

http://mile.ee.iisc.ernet.in:8080/tts_demo

You can see our TTS demo page and a box, where the Tamil text

in Unicode must be submitted.

Now, open another window in your browser and go to http://ta.wikipedia.org

This has Tamil text in Unicode. You can copy any part of the text from any

page of this Tamil Wikipedia (or any website that has Tamil text in

Unicode) and paste it to the box in our web demo. Now,

click the box “Submit”. You can download the .wav file created and play it

in any player such as Winamp, Windows Media player or VLC media player.

Listen to the demo and let me know your feedback and reaction.

Regards and advance thanks.

A G Ramakrishnan

இச்செயலி பற்றிய மேலதிக பின்னணித்தகவல்களுடன் இப்பதிவு பின்னர் இற்றைப்படுத்தப்படும்.

இப்போதைக்கு இந்த இனிய செய்தியை உங்களோடு பகிர்ந்து கொள்ளாமல் இருக்கத் தலையே வெடித்துவிடும் போலிருந்ததால் ஓர் அவசரப்பதிவு.

Software Freedon day Logo

இன்று மென்பொருள் விடுதலை நாள் .

GNU/Linux குறிப்பேடு இன்றுமுதல் கட்டற்ற மென்பொருளான WordPress இல் இயங்க ஆரம்பிக்கிறது.

ஓயாத போராட்டங்களுடனும் இடையறாத முரண்பாடுகளின் மோதல்களுடனும் உலகம் தன் வரலாற்று வழியில் நடந்துகொண்டிருக்கிறது.

அடக்குமுறைகளுக்கும் அநீதிகளுக்கும் சுரண்டல்களுக்கும் எதிரான போராட்டங்கள் காலகாலமாக மனித வரலாற்றை நகர்த்தி வந்திருக்கின்றன.

கண்ணுக்குத் தெரிந்த, தெரியாத கட்டுக்களுக்குள் மனிதகுலத்தின் பெரும்பகுதி ஒடுங்கிக்கிடக்கிறது.

கட்டுக்களை அறுத்தெறியும் வேட்கையும் வெவ்வேறு வெப்பநிலைகளில் மனிதகுலத்தின் மனங்களுக்குள் கனன்றுகொண்டிருக்கிறது.

தமது நலன்களுக்காக மற்றவர்களை அடக்கியாளவும் அழித்துவிடவும் நினைப்பவர்கள் போர்களைத் தொடக்குகிறார்கள். மானுடத்தின் குரலை நசுக்குகிறார்கள்.

அந்த அடக்குமுறைக்கு எதிராக பொறுமை கடந்து கொதித்தெழுபவர்கள் போராட்டங்களைச் செய்கிறார்கள்.

ஆயுதங்களால், கருத்துக்களால், தொழிநுட்பங்களால், கண்காணிப்பால் அதிகாரம் படைத்தோர் மக்களை அடக்கியாள்கிறார்கள்.

கண்ணுக்கு முன்னால் அநியாயங்களையும் சித்திரவதைகளையும் நாம் பார்க்கிறோம்.

இத்தனை நெருக்கடிகளோடு சுற்றும் இந்த உலகிலும், சுழலும் எங்கள் வாழ்விலும் மென்பொருள் விடுதலை அத்துணை முக்கியமானதா?

இல்லை!

மனிதருக்கு நீதி கிடைப்பதில்லை. உழைப்பவருக்கு உணவு கிடைப்பதில்லை. எத்தனையோ பேருக்கு உயிர்வாழும் உரிமை இல்லை. இவற்றுக்கு முன்னால் மென்பொருள் விடுதலை மிக நுண்ணிய பிரச்சினையே.

ஆனால்,

சுரண்டலையும் அடக்குமுறையையும் ஏகாதிபத்தியதையும் அதிகாரத்தையும் கண்காணிப்பையும் எம்மால் முடிந்த, எம்முன்னுள்ள எல்லா வழிகளாலும் எதிர்கொள்ள, எதிர்த்துநிற்க வேண்டிய கடமை எமக்குள்ளது.

மென்பொருள் விடுதலை சிறியதாயினும் அதிலொரு பகுதி.

தகவற் தொழிநுட்பமும், மென்பொருட்களும், நுட்பியல் வளர்ச்சிகளும் இன்று மற்றைய ஒடுக்குமுறைகளுக்கெல்லாம் துணைபோகும் சாதனங்களாக மாறியிருக்கின்றன.

மிக நுணுக்கமாக எம்மை அடக்கியாள, அதிகாரம் செலுத்த அநீதியாளர்கள் இவற்றைக் கையிலெடுக்கின்றனர்.

சின்னஞ்சிறியளவிலேனும் அவர்களின் முயற்சிகளுக்கு எதிர்ப்பினைக் காட்டுவது இடையறாது எதிர்ப்பது இன்றியமையாததாகும்.

கூடவே,

இன்றைய உலக ஒழுங்கும் பொருளாதார அமைப்பும் சிதைத்துவிட நிற்கும் உன்னதமான மனித இயல்புகளான பகிர்தலையும், கூடி உழைத்தலையும், அன்பையும், தோழமையையும், பொதுநல எண்ணங்களையும், சமூக அக்கறையையும் நாம் மீட்டெடுக்க வேண்டியுள்ளது.

மனித இயல்பான சுயநலம் மட்டுமே ஊதிப்பெருப்பிக்கப்பட்டு மற்றெல்லா உன்னதங்களும் வலிந்து மறுக்கப்படும் சூழலில், இந்த மாற்றுக்கலாசார வடிவங்களை நாம் வேகத்தோடு தூக்கிப்பிடிக்க வேண்டியவர்களாகிறோம்.

கட்டற்ற மென்பொருள் இயக்கம், தொழிநுட்ப மேலாதிக்கங்களை, அதிகாரங்களை எதிர்த்து நிற்பதோடு மட்டுமல்லாது, மனித குலத்தின் நல்லியல்புகளைப் பேணிக்காக்க முன்னிற்கிறது.

இந்த நாள் அந்த உன்னதங்களை பேணுவதற்கான ஒரு குறியீடு.

அடக்குமுறைகளுக்கும் ஏகாதிபத்தியத்துக்கும் எதிராய் இயன்றவரை எழுவோம் என்று,

மனிதரை நேசித்து, அறிவை, உழைப்பை, அக்கறையை மற்ற மனிதர்களுக்காகவும், சமூகத்துக்காகவும், இயற்கைச்சொத்துக்களுக்காகவும் பகிர்ந்து மகிழ்வோம் என்று,

தனிமனிதராய் மட்டுமல்லாமல் சமூகமாயும் வாழ்வதன் இனிய உணர்வினை, நிறைவினை  அடைவோம் என்று,

மென்பொருட் பயனாளராயும் படைப்பாளராயும் இருக்கும் நாம் எமது துறை வழி இவற்றைச் செய்வொம் என்று,

இன்றைய நாளில் உறுதிகொள்வோம்.

மக்களை அணைந்துகொள். உன்னைச் சங்கமமாக்கு. “மானுட சமுத்திரம் நான்”  என்று கூவு!

ஆடுவோமே – பள்ளுப் பாடுவோமே
ஆனந்த சுதந்திரம் அடைந்து விட்டோமென்று
ஆடுவோமே – பள்ளுப் பாடுவோமே

எங்கும் சுதந்திரம் என்பதே பேச்சு – நாம்
எல்லோரும் சமமென்பது உறுதியாச்சு
சங்கு கொண்டே வெற்றி ஊதுவோமே – இதைத்
தரணிக்கெல் லாமெடுத்து ஓதுவோமே.

எல்லோரும் ஒன்றென்னும் காலம் வந்ததே – பொய்யும்
ஏமாற்றும் தொலைகின்ற காலம் வந்ததே – இனி
நல்லோர் பெரியரென்னும் காலம் வந்ததே – கெட்ட
நயவஞ்சக் காரருக்கு நாசம் வந்ததே

(இங்கே உள்ள படங்களின் மேல் சொடுக்கிப் பெரிதாக்கிப் பார்க்கலாம்)

GNU/Linux இற்கான KDE பணிச்சூழலே இவ்வாறு முதன் முறையாகத் தமிழ் இடைமுகப்பைக் கொண்டு வெளி வந்தது.

October 22 ம் நாள் 2000ம் ஆண்டு வெளிவந்த KDE 2.0 பதிப்பு இவ்வாறு தமிழ் இடைமுகப்பினை முதன்முறையாக உள்ளடக்கியிருந்தது.

பரவலாக தமிழ்ச்சூழலில் GNU/Linux பயன்பாடு வந்துவிட்டது. சொற்பமாயினும் சிலபேர் தமிழாக்க முயற்சிகளில் பங்கெடுக்கிறார்கள். இலங்கையில் மொரட்டுவைப் பல்கலைக்கழகத்தை மையப்படுத்தி சர்வேஸ் போன்றவர்கள் பங்குபெறும் தமிழாக்க வேலைகள் நடைபெறுகின்றன. தமிழகத்தில் தமிழ் உபுண்டு குழும அங்கத்தவர்கள் பலர் தமிழாக்கத்தில் ஈடுபடுகின்றனர். இதெல்லாம் எமது தலைமுறையினர்.

முன்னர் தமிழாக்கத்தில் ஈடுபட்டிருந்த தலைமுறையினரும் தொடர்ச்சியாகப் பங்களித்து வருகின்றனர்.

இந்த முதல் தமிழ் KDE வந்த காலம் அவ்வாறானதல்ல. தொழிநுட்ப ரீதியாக, ஆளணி வள ரீதியாக மிகப்பெரிய சவால்களுக்கு முகம் கொடுத்தே தமிழாக்க வேலைகளைச் செய்ய வேண்டி இருந்திருக்கும்.

இந்த வேலைகளைப் பொறுப்பெடுத்து சீராகச் செய்திருந்தவர்கள் Siva, Gomathi, Dinesh, Venkat, Vasee எனும் பெயர்களுடையவர்கள் என்று நான் தேடிய மூலங்களில் காணக்கிடைக்கினறன.

tamillinix yahoo group ஒரு பெரும் கடல் அங்கே மூழ்கினால் தமிழ் க்னூ லினக்ஸ் வரலாற்றின் முத்துக்களை நிறையப் பெற்றுக்கொள்ளலாம்.

இதில் வசீகரன் குழுவினர் பின்னர் இந்த தமிழ் இடைமுகப்புக்கொண்ட KDE இனை உள்ளடக்கி தமிழ் Knoppix நிகழ் வட்டினை உருவாக்கி வெளியிட்டிருந்தனர். அதுபற்றி பின்னரொருபோது விளக்கமாக எழுதுகிறேன்.

இந்த அருமையான தமிழ் இடைமுகப்பு வந்து பல ஆண்டுகளுக்குப்பிறகுதான் Microsoft எனும் பெரு வணிக நிறுவனத்தின் தமிழ் இடைமுகப்புப் பொதி வெளியிடப்பட்டது (அதுவும் சமூக உழைப்பைத் திருடி).

இலாப நோக்கற்ற சமூக அக்கறையும், மொழி மீதான நேசமும் கூட்டுழைப்பும் கணிமை உலகில் செய்திருக்கும் வியத்தகு சாதனைகளுக்கு தமிழ்ச்சூழலில் இது ஒரு நல்ல எடுத்துக்காட்டு.

இடைமுகப்பானது UTF-8 TSCII குறிமுறையில் அமைந்துள்ளது. இப்பொழுதுபோல் அக்காலத்தில் ஒருங்குறி ஆதரவு பரவலாக இருக்கவில்லை. கூடவே ஒருங்குறி தொடர்பான விவாதங்கள் பெருமளவில் ஓயாமலிருந்தது.

இங்கே KOffice இல் தமிழைக் காண்கிறோம் அக்காலத்தில் இருந்த சொற்ப அலுவலகச்செயலிகளுள் ஒன்று. இது இப்போது மிக சீர்படுத்தப்பட்ட நிலையில் இருக்கிறது. TSCII இலிருந்து ஒருங்குறிக்கு மாறியபோது தமிழர்கள் Koffice இனைக் கைவிட்டார்கள். நீண்டகாலத்துக்குப்பிறகே ஒருங்குறி ஆதரவு அதில் கிடைத்தது. இப்போது எல்லோரும் Openoffice பற்றி பேச ஆரம்பித்துவிட்டோம்.

மயிலை98 இனை அடிப்படையாகக்கொண்ட TSCII விசைப்பலகை உள்ளீட்டு முறை ஒன்று அமைக்கப்பட்டிருந்தது. இது தவிர தமிழ் VP என்றெல்லாம் உள்ளீட்டு முறைகள் இருந்தன. இந்த உள்ளீட்டு முறைகளின் வரலாறு குறித்து பின்னர் விரிவாக ஆய்வு செய்து எழுத வேண்டும்.

இது முனையத்தில் தமிழைக் கொண்டுவர அக்காலத்தில் எடுக்கப்பட்ட முயற்சி. தமிழ் முனையம் ஒன்றை சாத்தியப்படுத்தலாம் என்ற நம்பிக்கைகளின் தொடக்கம். இப்போது ஒருங்குறி வந்தபின் இதைவிட மோசமான நிலையில் தான் தமிழ் முனையப் பயன்பாடு இருக்கிறது. ஒரேயகல எழுத்துக்கள் என்ற பிரச்சினை தாண்டப்படமுடியாத சிக்கல். இப்போது ஏறத்தாழ தமிழ் முனையம் தொடர்பான முயற்சிகள் கைவிடப்பட்ட நிலைக்கு வந்துவிட்டது. வரைகலைப் பயனர் இடைமுகம் எல்லாவற்றையும் செய்யத்தொடங்கிவிட்டது.

UTF8-TSCII codec இனை Hans Peter Bieker என்பவர் உருவாக்கியளித்துள்ளார்.

இங்கே நான் சொல்லத்தவறிய தகவல்களையும் தவறுகளையும் போதாமைகளையும் அறிந்தவர்கள் பினூட்டம் வழியாக திருத்தி நிரப்பி விடுங்கள்.

இப்பதிவுக்கு ஆதாரமாக அமைந்தவை:

• தமிழ்ழிலின்ஸ் yahoo குழும மடற்களஞ்சியம் http://tech.groups.yahoo.com/group/tamilinix/
• http://tamillinux.sourceforge.net/
• எனது சொந்த அனுபவங்கள்

நிகழ்ச்சியின் உள்ளடக்கங்களை இங்கே பார்க்கவும்.

நூற்றுக்கும் மேற்பட்டவர்கள் இக்கருந்தரங்கில் கலந்துகொண்டதும் இறுதிவரை ஆர்வத்துடன் பங்கெடுத்ததும் மகிழ்ச்சி தருவதாய் அமைந்தது.

இவ்வெற்றியில் பெரும்பங்கெடுத்த நிகழ்ச்சி ஏற்பாட்டாளர்கள், குறிப்பாக ஜெகந்த் நன்றிக்குரியவர்.

கருத்தரங்கின் முன்பாதியில் பெரும்பாலும் கட்டற்ற மென்பொருள் இயக்கம் தொடர்பான சித்தாந்த ரீதியான அறிமுகங்களும் விளக்கங்களுமே இடம்பெற்றன.
கவனம் சிதறாமல் இவ்விஷயங்களைக்கேட்டுக்கொண்டிருந்து கேள்வி நேரத்தில் தத்துவம் சார்ந்த பல கேள்விகளையும் கேட்கத்தொடங்கினார்கள்.

திருக்கோணமலையில் இடம் பெறும் கட்டற்ற மென்பொருள் தொடர்பான முதல் கருத்தரங்கு இதுவேயாகும். கலந்துகொண்ட பலர் லினக்ஸ் என்ற சொல்லையே அன்றுதான் முதன் முறையாகக் கேள்விப்படுபவர்களாகவும் இருந்தனர்.

அப்படி இருந்தும் ஒவ்வொரு கேள்வி நேர இடைவெளிகளின் போதும் அடுக்கடுக்காக கேள்விகளைக் கேட்டதுடன், க்னூ/லினக்சினைத் தங்கள் சொந்தப்பாவனைக்குப் பயன்படுத்துவது தொடர்பான மிகுதியான ஆர்வத்தையும் வெளியிட்டனர்.

இக்கருத்தரங்கில் வழங்கப்படுவதற்கென “உபுண்டு க்னூ/லினக்ஸ் திருக்கோணமலைப் பதிப்பு” என்ற பெயரில் தனியான வழங்கல் ஒன்று வடிவமைக்கப்பட்டது.

இவ்வழங்கல் தொடர்பான மேலதிக விபரங்கள் இந்த வலைப்பதிவில் காணலாம்.

கருத்தரங்கின் இரண்டாம் பாதி இவ்வழங்கலை அடிப்படையாகக்கொண்ட செயன்முறை விளக்கங்களாகவே அமைந்திருந்தது.

பொதுவான மாற்று மென்பொருட்கள், தமிழ்ப்பயன்பாடு, நிறுவல் போன்றவை இவ்வழங்கலை அடிப்படையாக்கொண்டு விளக்கப்பட்டது.

இறுதிப்பகுதியில் முப்பரிமாண இடைமுகப்புடன் கூடிய compiz fusion இனை அறிமுகப்படுத்தி நிகழ்த்திக்காட்டியபோது அரங்கு நிறைந்த கைதட்டல் ஓசையும் ஆரவாரமும் எழுந்தது எதிர்பாராத இன்ப அதிர்ச்சி.

வரைகலை வேலைகளுடன் தொழின்முறையாக தொடர்புகள் கொண்டுள்ள ஆர்வலர் ஒருவரை நான் க்னூ/லினக்சுக்கு முற்றாக மாற வேண்டாம் இரட்டை இயங்குதளங்களைப் பயன்படுத்துங்கள் என்று அறிவுறுத்தியபோது அவர் பெரும் ஏமாற்றமடைந்து சோர்ந்து போனது மறக்க முடியாத சம்பவம்.

தொழிநுட்ப ரீதியாக கவரப்பட்டதை விட, க்னூ/லினக்சினைப் பயன்படுத்த வேண்டும் என்ற ஆர்வத்தைக் கருத்தியல் ரீதியாகப் பெறவேண்டுமென்ற நோக்கத்தோடு வடிவமைக்கப்பட்டிருந்த நிகழ்ச்சி நிரல் வெற்றியளித்திருந்தமை, மூடிய மென்பொருட்களுக்கு எதிரான உணர்வை பல வழிகளிலும் ககலந்துகொண்டவர்கள் வெளிப்படுத்தியதிலிருந்து அறிந்துகொள்ளக்கூடியதாயிருந்தது.

இக்கருத்தரங்கின் வெற்றி அடுத்தடுத்து இப்பரப்பில் தொடர்ச்சியான கருத்தரங்குகளைப், பயிற்சிப்பட்டறைகளை நடத்துவதற்கான தளத்தையும் அமைத்துத்தந்துள்ளது.

திருக்கோணமலையை அடிப்படையாகக்கொண்டு க்னூ/லினக்ஸ் பயனர் குழுமம் ஒன்றினை தொடக்கி வைக்கக்கூடிய புறநிலைகளும் கனிந்து வந்துள்ளன.

கலந்துகொண்ட மாணவர்கள் அனைவருக்கு லியோ கழகத்தினரால் சான்றிதழ்கள் வழங்கப்பட்டன.

உபுண்டு க்னூ/லினக்ஸ் திருக்கோணமலைப்பதிப்பின் வட்டுக்களும், நான்குபக்கக் கையேடு ஒன்றும் கலந்துகொண்ட அனைவருக்கும் விநியோகிக்கப்பட்டன.

குறிப்பு:

[படங்களில் உள்ளபடி இடைவேளையில் தாகம் தீர்க்க பெப்சி வழங்கப்பட்டது. நான்குமணி நேரம் தொடர்ச்சியாக உரத்துப்பேசியபடி இருந்தேன். தாகம். வேறு தெரிவு இருக்கவில்லை. பெப்சி,கோக் அவற்றின் துணை உற்பத்திகள் உடலுக்கும் உலகுக்கும் தீங்கான பானங்கள் அவற்றைக் குடிப்பதை முடிந்தவரை தவிர்த்துக்கொள்ளுங்கள்]

இது “எழுதுபவர்களுக்கானது”.

எழுதுங்கள்; எழுதுவதை மட்டுமே செய்யுங்கள் என்பதே இதன் அடிப்படைக் கோட்பாடு.

எழுதும் மனநிலையை சிதைக்கும் ஏராளம் விஷயங்கள் குறுக்கிட்டுக்கொண்டிருக்கும் கணித்திரை எழுத்துச் சூழலில் கணித்திரை எழுத்தாளர்களுக்கு மிகவும் உதவும் ஒரு மென்பொருள் இது.

Pyroom என்று பெயரிடப்பட்டுள்ள இது வழக்கமான உரைதிருத்திகளைப் (Text Editors) போன்றதுதான். ஆனால் என்ன, நீங்கள் எழுதத்தொடங்கிவிட்டால் வேறு எதையும் நீங்கள் பார்க்க வேண்டியதில்லை. எங்கேயும் கவனம் சிதற வேண்டியதில்லை. நீங்கள் எழுதுவதை மட்டுமே நீங்கள் கவனிக்க முடியும்.

எழுத்தாளர்களின் உளவியல் அறிந்து இதனை வடிவமைத்திருக்கிறார்கள்.

“எழுதுவதைத் தவிர உங்களுக்கு வேறு வழியில்லை”

உங்கள் கணினியின் திரையை கருமை நிரப்பிவிட எழுதும் திடலை மட்டுமே நீங்கள் பார்க்க முடியும்.

திடலைச் சுற்றியிருக்கும் எல்லைக்கோட்டினைக்கூட நீங்கள் அகற்றி விடலாம்.

படத்தில் இருக்கும் கருப்பில் பச்சை நிற இடைமுகப்பு எனக்கு வசதியாக இருக்கிறது. வேண்டுமானால் நீங்கள் உங்களுக்கு வேண்டியபடி நிறங்களை அமைத்துக்கொள்ளலாம்.

இந்த வலைப்பதிவை இம்மென்பொருள் கொண்டே எழுதிக்கொண்டிருக்கிறேன். உண்மையிலேயே மிகவும் பயனுள்ளதாய்ப் படுகிறது

தமிழ் ஒருங்குறிக்கு ஆதரவுண்டு. ஒன்றுக்கு மேற்பட்ட ஆவணங்களை எழுதும் விதமாக Buffer அடிப்படையிலான வசதி உண்டு. தானாக குறிப்பிட்ட நேரத்துக்கொருமுறை ஆவணத்தைச் சேமித்துவிடுகிறது. வேகமாக விசைப்பலகை கொண்டே அனைத்து இயக்கங்களையும் கட்டுப்படுத்த முடியும்.

பொதுமக்கள் உரிமத்தில் அமைந்த கட்டற்ற மென்பொருள்தான் இது என்பதையும் சொல்லவேண்டுமா என்ன?

பத்திரிக்கை நிறுவனங்களில் தட்டெழுத்தாளர்கள் இவ்வாறான கருந்திரை முனையங்களைப் பயன்படுத்துவதை நான் பார்த்திருக்கிறேன்.

நம் வலைப்பதிவாளர்களுக்கு மிகவும் பயன்படும் மென்பொருள்.

பயன்படுத்திப் பார்த்துவிட்டுக் கருத்துச்சொல்லுங்கள்.

எழுதுங்கள், எழுதுங்கள்; எழுதும்போது எழுதுவதை மட்டுமே செய்யுங்கள்

ubuntu 8.10 இல் உள்ள பிரச்சினைகள்,

1. தமிழ் மொழி இடைமுகப்பு இணையம் மூலமே நிறுவப்படவேண்டியுள்ளது.

2. பயன்பாட்டிலுள்ள உள்ளீட்டு வடிவங்கள் இயல்பிருப்பாக இல்லை.

3. mp3, DVD போன்றவற்றை இயக்கத்தேவையான மென்பொருட்கள் இல்லை

4. க்னூ/லினக்சின் கவர்ச்சிகரமான மென்பொருட்கள் அதில் உள்ளடங்கி இல்லை.

இவற்றை களையுமுகமாக உபுண்டுவை அடிப்படையாகக்கொண்ட புதிய வழங்கல் ஒன்றினை உருவாக்க வேண்டியிருந்தது.

remastersys பயன்படுத்தி இப்புதிய வழங்கலை உருவாக்கினேன். ஏற்கனவே நூலகம் நிகழ்வட்டு உருவாக்கிக்கிடைத்த அனுபவங்கள் மிகவும் பயனளித்தது.

பெரிய பிரச்சினை இடப்பற்றாக்குறைதான். நெருக்கப்பட்ட iso படிமம் 700 மெகாபைட்டுக்கு குறைவாக இருந்தாக வேண்டும் (DVD வழங்க முடியாது. செலவு, DVD Drive பிரச்சினைகள்)

எனவே உபுண்டுவின் பின்வரும் முக்கிய பொதிகள் அகற்றப்படவேண்டியிருந்தது.

* Help Documents
* F-Spot
* Evolution
* GNOME Games

இவைதவிர வேறும் பல மென்பொருட்கள் அகற்றப்பட்டது.

கூடவே,

* Pidgin அகற்றப்பட்டு Kopete ஆக் பிரதியிடப்பட்டது. (webcam வசதிக்காக)

* மிக நீண்ட மனப்போராட்டத்துக்கும் சமரசங்களுக்கும் பின்னர் Ekiga அகற்றப்பட்டு Skype நிறுவப்பட்டது.

* இடப்பிரச்சினையாலும், நிகழ்வட்டில் வேகம் தேவைப்படுவதாலும் Openoffice Calc அகற்றப்பட்டு Gnumeric நிறுவப்பட்டது.

* Totem அகற்றப்பட்டு VLC நிறுவப்பட்டது. (இது அனைத்து கோப்பு வடிவங்களையும் பிரச்சினையின்றி இயக்க உதவும்)

புதிதாக தமிழ் பயன்பாட்டுக்குத்தேவையான பொதிகளும் தமிழ் இடைமுகப்புப்பொதியும் நிறுவப்பட்டது. இதில் தமிழ் இடைமுகப்பானது பயனர் தெரிவின் அடிப்படையில் செயற்படுமாறே அமைக்கப்பட்டது. தமிழ் இடைமுகப்பை விட ஆங்கில இடைமுகப்புடன் கருத்தரங்கில் வட்டுக்கள் வழங்கப்பட வேண்டிய சூழல் உண்டு. முற்றிலும் புதியதொன்றாக அல்லாமல் க்னூ/லினக்சினை ஓரளவு பழக்கப்பட்ட ஒன்றாகவே பயனர் பார்க்க வேண்டும் என்று எதிர்பார்க்கிறேன்.

ஆனால் பார்வையாளர்களைக் கவருமுகமாக தமிழ் இடைமுகப்பை மாற்றிக்கொள்ளும் வழிமுறைகளும், தமிழ் இடைமுகப்பும் திரையில் காண்பிக்கப்படும். தமிழ் இடைமுகப்பாக்கத்தில் பங்குபற்றும் வழிமுறைகளும் விளக்கப்படும்.

தமிழ் 99, பாமினி, இலங்கையின் தரப்படுத்தப்பட்ட தளக்கோலம், ஆங்கில ஒலியியல் ஆகியவை உள்ளீட்டு முறைகளாக உள்ளடக்கப்பட்டுள்ளன.

முதல் தடவை க்னூ/லினக்சை இவ்வட்டு மூலமாகவே அறிமுகப்படுத்த வேண்டியுள்ளதால் ஆர்வமூட்டக்கூடிய பல மென்பொருட்களைக் காட்சிப்படுத்த வேண்டிய தேவையும் எழுகிறது.
மிகச்சிரமப்பட்டு இடமொதுக்கி பின்வரும் பொதிகள் நிறுவப்பட்டுள்ளன.

* Kdenlive video editor
* Audacity
* Hydrogen Drum machine

இப்பொதிகள் பயனுள்ள “விளையாட்டுக்களாக” வும் இருக்கும் என்பதால் Games அகற்றப்பட்டுள்ளது

நேரப்பற்றக்குறை காரணமாக இடைமுகப்பின் எழுத்துரு, அழகு போன்றவற்றை கவனிக்க முடியாமல் போய்விட்டது.

திருக்கோணமலை நிகழ்வட்டுக்கான Wallpaper வடிவமைப்புக்காக திருக்கோணமலைக் கடற்கரையை அழகாக ஒளிப்படம் எடுத்துத் தந்துதவிய வி. பிரஷாந்தனுக்கு நன்றிகள்.

அவரது ஒளிவண்ணத்தில் உருவான Wallpaper இதோ :

கருத்தரங்கினை ஒழுங்குபடுத்தி அதற்கான உழைப்பினைச் செலுத்திக்கொண்டிருக்கும் ஜெகந்த்துக்கு சிறப்பு நன்றிகள்.

வட்டினைத் தரவிறக்கத்துக்கு வழங்குவதற்கான வசதிகள் தற்போது இல்லை.